Олон улсын эмэгтэйчүүдийн эрхийг хамгаалах өдөрт зориулан, хөлбөмбөгийн ертөнцөд түүх бүтээсэн эмэгтэйчүүдийг энэ удаагиййн нийтлэлээрээ онцолж байна. Тэдний эр зориг, ур чадвар, хөлбөмбөгт оруулсан хувь нэмэр нь өнөөгийн эмэгтэйчүүдийн хөлбөмбөгийн хөгжлийн суурь болсон билээ.
1905 онд төрсөн Английн хөлбөмбөгч Лиллиан Парр бөгөөд түүний тоглолтын арга барил, гоолын амжилт нь тухайн үеийн эрэгтэй тоглогчдоос дутахгүй байсан гэдгээрээ танигджээ. Тэрээр 1920-оод оны үед "Dick, Kerr Ladies" багийнхаа төлөө 900 гаруй гоол оруулж, эмэгтэйчүүдийн хөлбөмбөгийг шинэ түвшинд хүргэсэн анхдагчдын нэг байв. Өдгөө Лиллиан нь Английн Хөлбөмбөгийн Алдрын танхимд нэрээ мөнхөлсөн анхны эмэгтэй тоглогч юм.
Миа Хэмм бол АНУ-ын эмэгтэйчүүдийн хөлбөмбөгийг дэлхийд таниулсан шилдэг тоглогчдын нэг юм. Тэрээр 1991, 1999 онуудад дэлхийн аварга болж, 275 тоглолтод нйит 158 гоол оруулж байсан домогт амжилттай. Түүний нэр дэлхий даяар хүндлэгдэж, эмэгтэйчүүдийн хөлбөмбөгийн хөгжилд асар их нөлөө үзүүлсэн.
Мартаг танихгүй фанат гэж бараг үгүй байх, тэрээр эмэгтэйчүүдийн хөлбөмбөгийн дэлхийн хамгийн шилдэг тоглогчдын нэг гэж үзэгддэг. Марта FIFA-гаас зургаан удаа “Оны шилдэг эмэгтэй тоглогч”-оор шалгарч, Олимпын мөнгөн медаль хүртэж байсан, эмэгтэйчүүдийн спортыг шинэчилж яваа гайхалтай тамирчин юм. Түүний тоглолт, хурд хүч, ур чадвар нь дэлхий даяар сая сая охидыг “эрчүүдийн спорт” гэх хөлбөмбөгт дурлуулан, спортын гайхамшгийг дэлгэрүүлсээр байгаа гэхэд хилсдэхгүй биз ээ.
Биргит Принц Германы эмэгтэйчүүдийн хөлбөмбөгийн хамгийн алдартай тоглогчдын нэг юм. Тэрээр хоёр удаа дэлхийн аварга болж, гурван удаа FIFA-гийн оны шилдэг тоглогчоор шалгарч байсан. Германы шигшээ багт 214 тоглолтод оролцож, 128 гоол оруулж байсан нь түүний ямаршуу тоглогч вэ гэдгийг илтгэнэ.
АНУ-ын шигшээ багийн ахлагч Алекс Морган бол эмэгтэйчүүдийн хөлбөмбөгийн өнөөгийн хамгийн нөлөө бүхий тоглогчдын нэг юм. Тэрээр 2015, 2019 онуудад ДАШТ-ий аварга болж, 2012 оны Олимпын наадамд алтан медаль хүртсэн. Түүний хөлбөмбөгийн ур чадвар болон эмэгтэйчүүдийн спортын эрх тэгш байдлын төлөө хийсэн үйлс нь олон залуу тоглогчдод үлгэр дууриал болсоор байгаа билээ.
Өнөөдөр эмэгтэйчүүдийн хөлбөмбөг дэлхийн хэмжээнд эрчимтэй хөгжиж, шинэ үеийн авьяаслаг тоглогчид тодорсоор байна.
Эдгээр эмэгтэйчүүд нь зөвхөн гайхалтай тамирчид төдийгүй, нийгмийн хязгаарлалтыг даван туулж, спортод эмэгтэйчүүдийн байр суурь бага байсан цаг үед зогсолтгүй хөдөлмөрлөсөн олон үүрэг хариуцлагын дунд мөрөөдлөө орхигдуулаагүй тэмцэгчид юм. Тэд бүгд өөрсдийн авьяас чадвараа нотолж, хүйсийн эрх тэгш байдлын төлөө тууштай зогсож, дэлхий нийтэд эмэгтэйчүүдийн хүч чадал, тууштай байдал, ёс зүй, ур чадвар ямар үнэ цэнтэй болохыг үе үед сануулсан билээ.
Энэ өдөр бид хөлбөмбөгийн талбай дээр болон гадна талд өөрсдийн мөрөөдөл, хүсэл зоригийн төлөө зогсож буй бүх эмэгтэйчүүдийг хүндэтгэн тэмдэглэж байна. Олон улсын эмэгтэйчүүдийн эрхийг хамгаалах өдрийн мэнд хүргэе! ⚽✨
#KhangaridFC
