Хөлбөмбөг нь дэлхийн өнцөг булан бүрт, сая сая хүний зүрх сэтгэлийг догдлуулж, нийгэм, соёлын хил хязгаарыг ч даван туулах хүчийг өгч чаддаг гайхалтай спорт билээ. Энэхүү спортод дурлана гэдэг нь зөвхөн дуртай баг, тоглолтуудыг үзэхээс гадна, түүхэн мөчүүд, баатруудын түүх, гайхалтай ялалтууд, заримдаа гашуун ялагдлуудыг ч хамт мэдрэн, сэтгэл хөдлөлөө хуваалцахад оршдог. Үзэгчдэд хөлбөмбөгийн үнэ цэнийг ойлгуулж, спортоор дамжуулан амьдралын утга учир, урам зоригийг өгөх шилдэг кино бүтээлүүдийн тухай энэ нийтлэлээр танилцуулж байна.
Найруулагч Гүриндэр Чандхагийн найруулсан, мөрөөдөлдөө үнэнч байх, хүсэл тэмүүллээ дагах урам зоригийг өгөх, хөнгөн бөгөөд хөгжилтэй кино юм. Үйл явдлын тухайд Жесс хэмээх Энэтхэг охины мэргэжлийн хөлбөмбөгийн тоглогч болох мөрөөдлийн тухай өгүүлэх бөгөөд гэр бүл, нийгмээс түүн дээр буух хүлээлтүүдийн эсрэг хэрхэн зоригтой тэмцэж, өөрийгөө олж нээж буйг харуулна.
Найруулагч Стивен Чоугийн бүтээл, энэхүү инээдмийн кинонд багийн ажиллагааны үнэ цэнэ, нөхөрлөл, хайр дурлал, эр зориг, хичээл зүтгэл гэх мэт сэдвүүдийг фантазийн элемэнт оруулан хөгжилтэйгөөр харуулдаг. Күнг Фүгийн өвөрмөц арга барилыг хөлбөмбөгтэй хослуулан тоглох багийн гишүүд ялалтанд хэрхэн хүрч буйг үзэгчид та бүхэн шимтэн үзээрэй.
"The Great Match" (2006)
Дэлхийн гурван хоорондоо өөрөөс гадна, хамгийн алслагдмал бүс нутагт амьдрах, гурван өөр дүрийн хөлбөмбөгийн 2002 оны Японд болж өнгөрсөн ДАШТ-ий финалын тоглолтыг үзэх хүсэл, тэдний тус зорилгоо биелүүлэхээр явах замд учрах адал явдал, бэрхшээлүүдийг харуулна. Сонирхуулахад, уг кинонд Монголын талд зураг авалтаа хийсэн хэсэг байдаг. Хөлбөмбөгийн хүч, спорт хэрхэн хүмүүсийг нэгтгэдэг тухай үзэгч та өөр өөр соёлуудыг сонирхонгоо тухлан үзээрэй.
Цувралын зохиомол ертөнцөд, Америк хөлбөмбөгийн дасгалжуулагч Тед Лассо Английн “AFC Richmond” хөлбөмбөгийн багийн дасгалжуулагчаар ажиллах болсноор шинэ спорт, шинэ соёлд хэрхэн дасан зохицож буй тухай өгүүлнэ. Киноны гол санаа нь өөдрөг үзэл, багийн ажиллагаа, өөртөө болон бусдад итгэх итгэлийг голцуу хөндсөн, уран сайханы кино юм.
Энэхүү кино нь Сантьяго Мунез хэмээх Мексик залуугийн мөрөөдлийн замналаар хөлбөмбөгийн ертөнцөд хэрхэн хөл тавьж буй тухай өгүүлнэ. Тэрээр Лос Анжелес хотын гудамжнаас гараагаа эхэлж, Английн “Ньюкасл Юнайтед” багт тоглогчоор сонгогдон, амжилтын өөд тэмцэж буй сэтгэл хөдөлгөм адал явдлыг харуулдаг. "Goal!" кино нь мөрөөдлийнхөө төлөөх шургуу хөдөлмөр, тэвчээр, итгэлийг онцолсон, урам зориг хайрлах гайхалтай бүтээл юм.
Энэхүү кино нь 1950 оны Дэлхийн аварга шалгаруулах тэмцээний үеэр Америкийн хөлбөмбөгийн багийн гайхамшигт ялалтыг харуулдаг. Энэ тоглолтод АНУ-ын баг тухайн үед хүчирхэгт тооцогдож байсан Английн багийг хожсон бөгөөд энэ нь хөлбөмбөгийн түүхэнд дурсагдах түүхэн мөч болсон юм.
Энэ баримтат кино нь дэлхийн хөлбөмбөгийн домогт тоглогч Диего Марадонагийн амьдрал, спортын карьер, амжилт болон бэрхшээлүүдийг үзэгч таны харж байгаагүй өнцгөөс, үнэн бодитоор хүргэнэ. Намтар кинонуудаараа алдаршсан найруулагч Асиф Кападиагиа-ийн тус бүтээлийг үзэн, Марадонагийн хосгүй ур чадвар, түүний амьдралын уналт, босолтуудыг хуваалцаарай.
Энэхүү баримтат кино нь “Манчестер Юнайтед” багийн алдарт дасгалжуулагч Алекс Фергюсоны амьдрал, түүний хэрхэн амжилтад хүрсэн тухай өгүүлэх болно. Спортын ертөнцөд зориг, шийдэмгий байдал, манлайлал ямар их нөлөөтэйг сэтгэлд тань хоногшуулах бүтээл юм.
1954 оны ДАШТ-ий үеэр Баруун Германы шигшээ багийн гайхалтай ялалт, мөн энэхүү ялалт нь дайны дараах Германы нийгэмд хэрхэн эерэг өөрчлөлт авчирсан тухай эл кинонд өгүүлнэ. Кино нь спортын ялалт зөвхөн тоглолтоор бус, улс үндэстний сэтгэл зүйд ч нөлөөлж чадахыг харуулсан урам зориг дүүрэн, түүхэн бүтээл юм
Энэхүү нийтлэлдээ бид хөлбөмбөгийн спортын гайхамшгийг харуулсан олон төрөл, жанрын кинонуудыг багтаахыг хичээлээ. Инээдэм, адал явдал, урам зориг болон бодит түүхүүдийг харуулсан эдгээр кинонууд нь зөвхөн хөлбөмбөгийн фенүүд гэлтгүй хүн бүрт сонирхолтой байхын сацуу амьдралд тань үнэ цэнэ үлдээнэ хэмээн найдаж байна. Найзууд, гэр бүлийнхэнтэйгээ тухлан сууж, цагийг сайхан өнгөрөөхийг хүсэе.
“Хангарьд”-тай хамт байгаарай, дараагийн нийтлэлээрээ эргэн уулзацгаая!
