Хөлбөмбөгийн спорт Монгол улсад дэлгэрэх үр үндэс нь анх 1954 онд тавигдсан хэмээн тэмдэглэснээс хойш 70-аад жил өнгөрөөд буй. Орхон аймгийн “Хангарьд” хөлбөмбөгийн клуб нь бараг л зуун жилийн түүхтэй манай улсын хөлбөмбөгт онцгой байр суурь эзэлдэг, хөдөө орон нутгийг төлөөлсөн, нэр нөлөөтэй багуудын нэг билээ. Энэ нийтлэлээр Хангарьд багийнхаа үүсэл хөгжил, түүхийн талаарх сонирхолтой мэдээллүүдийг хүргэхээр зорилоо.
Хангарьд клубийн түүх нь тэртээ 20 гаруй жилийн өмнө буюу 1996 онд Монголын хөлбөмбөгийн үндэсний дээд лиг анх зохион байгуулагдахад, Орхон аймгийн баг "Эрдэнэт" нэрээр баг бүрэлдэхүүнээ үүсгэн оролцож, нийт 7 багийн дунд 4-р байрт шалгарч байсан үеэс үүсэлтэй. Тухайн үедээ “Нинж” компанийн “Эрдэнэт” гэх нэрээр явж байснаа 2000 оноос "Хангарьд" болгон өөрчилж байсан түүхтэй. Удалгүй 2001, 2003, 2004 онуудад үндэсний дээд лигийн аварга болж, “Хангарьд” гэх нэр Монголын хөлбөмбөгт чангаар цуурайтах болсон юм. Үүнээс 2004 “Үндэсний дээд лиг”, “Холбооны цом”-ын алтан медалийг хослуулсан 2004 оныг онцлууштай.
"Хангарьд" болон "Эрчим" клубүүдийн хоорондын өрсөлдөөн бидний түүхэнд онцгой байр суурь эзэлдэг. "Эрчим" клуб нь дээд лигийн 10 гаруй удаагийн аварга болсон, Монголын хөлбөмбөгийн маргаангүй шилдэг багуудын нэг болсон хүчтэй баг юм. Эдгээр хоёр багийн тоглолтууд үргэлж сонирхолтой, өрсөлдөөнтэй болж, үзэгчдийн анхаарлыг ихэд татдагаараа тэмдэглэгдсэн байдаг.
2004-2006 онуудад "Хангарьд" болон "Хоромхон" клубүүдийн хооронд өсвөрийн ангилалд ширүүн өрсөлдөөн өрнөсөн цаг үе байв. 2004 онд "Хангарьд" 1:0 харьцаатайгаар хожиж байсан бол, 2005 онд "Хоромхон" 4:1 харьцаатайгаар хожиж байжээ. Эдгээр тоглолтууд нь хоёр багийн хоорондын өрсөлдөөнийг улам бүр нэмэгдүүлсэн тухай тухайн үед “Хоромхон” багийн тоглогч байсан, спортын сэтгүүлч, нийтлэлч Б. Батзаяа өнгөрөгч оны 12 сард болсон “Night with Khangarid” эвент дээр хуучилсан байдаг. Дэлгэрэнгүй яриаг уншигч та “Khangarid FC” youtube сувгаас эвентээс бичсэн подкаст дугаараас хүлээн авч сонсоно биз ээ.
Өдгөө "Хангарьд" клубийн төлөө зүтгэсэн шилдэг тоглогчдын залгамж халаа, шинэ үеийнхэн маань хаана ч гологдохооргүй авьяаслаг залуус байгааг өнгөрөгч улирлуудын тоглолтууд харуулсаар байгаа бөгөөд цаашид дэлхийн тавцанд харуулахаар зорьж байгаа юм.
Мөн бид ирээдүй болсон өсвөр үеийнхнийхээ бэлтгэл сургуулилтад онцгойлон анхаарал хандуулж, 10-16 насны ангилалд амжилттай үйл ажиллагаагаа явуулж байна. Энэ нь клубийнхээ нэрийг өндөрт өргөх ирээдүйн шилдэг тамирчдыг бэлтгэх, цаашлаад Монголын хөлбөмбөгийн хөгжилд хувь нэмэр оруулах том алхам хэмээн үзэж байна.
Ийнхүү нийтлэлийнхээ төгсгөлд богино дүгнэлт хийхэд, "Хангарьд" клуб нь Монголын хөлбөмбөгийн түүхэнд чухал үүрэг гүйцэтгэж, хөдөө орон нутгийн хөлбөмбөгийг хөгжүүлэхэд үнэтэй хувь нэмэр оруулсаар байгаа баг бөгөөд үүнд өдийг хүртэл бидэнтэй хамт байсан үе үеийн баг, тамирчид, арын албаныхан, дэмжигч спонсорууддаа болон үнэнч фанатууд та бүхэндээ баярлалаа. Энэхүү нийтлэлээр Хангарьд баг болон Монголын хөлбөмбөгийн талаар бага ч гэсэн юм мэдсэн болов уу, хэмээн найдаж байна.
“Хангарьд”-тай хамт байгаарай, дараа эргэн уулзацгаая!
